1.2 milyon telefona sızan kiber şəbəkə məhv edilib!

     Latın Amerikası və Avropada keçirilən birgə əməliyyat nəticəsində yarım milyon insanın şəxsi məlumatlarını oğurlayan nəhəng fişinq şəbəkəsi yaxalanıb. “Kaerb əməliyyatı” adlı əməliyyat nəticəsində 17 nəfər həbs edilib, yüzlərlə elektron cihaz ələ keçirilib.

     Kibertəhlükəsizlik firması Group-IB tərəfindən verilən açıqlamaya görə, 2018-ci ildən fəaliyyət göstərən fişinq şəbəkəsini Cənubi Amerikada yerləşən bir şəxs idarə edib. Bu şəxs, cinayətkarlara irimiqyaslı fişinq hücumları etməyə imkan verən “iServer” adlı avtomatlaşdırılmış fişinq platforması hazırlayıb. iServer, əsasən ispandilli istifadəçiləri hədəf alırdı. O, zəng, SMS və e-poçt vasitəsilə saxta linklər göndərməklə istifadəçilərin giriş məlumatlarını və digər şəxsi məlumatlarını ələ keçirirdi. Bu oğurlanmış məlumatlar, oğurlanmış smartfonların kilidini açmaq üçün istifadə edilmişdir.     Şəbəkə ləğv edilməzdən əvvəl 2000-dən çox cinayətkarın iServer vasitəsilə 1.2 milyondan çox cihaza giriş əldə etdiyi təxmin edilir. Tədqiqatçılar bildiriblər ki, iServer telefonun kilidini açmağa yönəlmiş mürəkkəb fişinq modelidir və standart fişinq platformalarından fərqlənir. Onun avtomatlaşdırılmış interfeysi, parolları oğurlamağı və təhlükə altında olan cihazlarda təhlükəsizlik kilidlərini keçməyi asanlaşdırdı. Əməliyyat çərçivəsində Latın Amerikası və Avropada keçirilən reydlərdə 17 nəfər saxlanılıb. Səlahiyyətlilər, həmçinin fişinq hücumları və oğurlanmış məlumatları ehtiva edən 900-dən çox kompüter və mobil telefon ələ keçiriblər.