Amazon-un dronları bağlamaları hovuz və göllərə atmağa başlayıb

Amazon dronlarla sürətli çatdırılma xidmətini ABŞ-də genişləndirməyə hazırlaşır. Xidmətin yaxın gələcəkdə 500 şəhərdə fəaliyyət göstərməsi planlaşdırılır. Lakin çatdırılmaların sayı artdıqca dronların bağlamaları uyğun olmayan yerlərə buraxması ilə bağlı maraqlı hadisələr də üzə çıxır.

Bu həftə ABŞ televiziyalarından birində yayımlanan videoda Amazon-un çatdırılma dronunun Texasda bir müştərinin hovuzu üzərində dayanaraq bağlamanı birbaşa suya buraxdığı görünür.

Üstəlik, bu ilk belə hadisə deyil. Daha əvvəl sosial mediada yayılan başqa bir videoda dron bağlamanı hovuzun kənarına buraxsa da, pərlərdən yaranan güclü hava axını bağlamanı hovuza sovurmuşdu.

Başqa bir Amazon müştərisinin paylaşdığı görüntülərdə isə dron bağlamanı kiçik gölün yaxınlığına buraxır. Yerə düşən bağlama sıçrayaraq suya düşür.

Bu hadisələr Amazon-un dron çatdırılması sistemində qarşılaşdığı ilk problemlər deyil. Ötən il şirkət Finiks bölgəsində dron çatdırılmalarını müvəqqəti dayandırmışdı. Buna səbəb iki MK30 çatdırılma dronunun tikinti kranına çırpılması olmuşdu. Dronların internet kabellərinə zərər vurması və evlərin divarlarına çırpılması ilə bağlı hadisələr də qeydə alınıb.

Amazon bildirir ki, dron çatdırılma nöqtəsinə çatdıqdan sonra bağlamanı buraxmazdan əvvəl ərazidə insanların olub-olmadığını yoxlayır. Son hadisələr isə sistemin hovuz, göl və digər uyğun olmayan səthləri də daha dəqiq müəyyənləşdirməsinə ehtiyac olduğunu göstərir.

Dron çatdırılmasının yüzlərlə şəhərə genişləndirilməsi Amazon üçün mühüm sınaq olacaq. Şirkət sürətli və avtomatlaşdırılmış çatdırılmanı geniş miqyasda tətbiq etmək istəyirsə, bağlamanın sadəcə düzgün ünvana deyil, həmin ünvanda düzgün yerə çatdırılmasını da təmin etməli olacaq.