Apple maliyyələşdirmə proqramı üçün iPhone kilidləmə funksiyası hazırlayır

  Apple-ın iOS 27 əməliyyat sisteminin beta versiyasında aşkarlanan kodlar şirkətin hazırladığı yeni Apple Upgrade maliyyələşdirmə proqramı ilə bağlı diqqətçəkən detalı üzə çıxarıb. Məlumata görə, aylıq ödənişlərini gecikdirən istifadəçilərin iPhone-ları avtomatik olaraq məhdud rejimə keçirilə bilər. Apple-ın yaxın günlərdə təqdim edəcəyi gözlənilən Apple Upgrade xidməti istifadəçilərə iPhone, iPad, Mac və Apple Watch kimi cihazların dəyərini hissə-hissə ödəməyə imkan verəcək. Şirkətin bu proqramı maliyyə texnologiyaları şirkəti Klarna ilə əməkdaşlıq çərçivəsində həyata keçirəcəyi bildirilir.  9to5Mac tərəfindən iOS 27 beta kodlarında aşkar edilən məlumata əsasən, sistemdə "Restricted Mode" adlı yeni rejim hazırlanır. Bu rejim aktiv olduqda istifadəçi yalnız əsas funksiyalardan və müəyyən tətbiqlərdən istifadə edə biləcək. Hazırkı kodlara görə əlçatan qalacaq tətbiqlər bunlardır:

• App Store
• Wallet
• Settings
• Health
• Passwords
• Clock
• Magnifier
• Accessibility Reader

  Bundan əlavə, kodlarda yer alan "Partner Finance Lock" adlı digər mexanizm cihazın sıfırlanmasının, yenidən satılmasının və hətta ehtiyat hissələri üçün sökülməsinin qarşısını almağı hədəfləyir. Bu qoruma funksiyasının Find My infrastrukturu ilə işlədiyi bildirilsə də, maliyyə tərəfdaşının istifadəçinin məkan məlumatlarına çıxış əldə etmədiyi qeyd olunur. Hazırda Apple bu funksiyanın hansı hallarda aktivləşəcəyi və neçə gecikdirilmiş ödənişdən sonra tətbiq ediləcəyi barədə rəsmi açıqlama verməyib. Bununla yanaşı, funksiyanın yanlışlıqla işə düşməsi ehtimalı da tam istisna edilmir.