Bitdefender AI agentlərinin icazəsiz addımlarını bloklayan alət təqdim etdi

    “Bitdefender” avtonom süni intellekt agentlərinin addımlarını icradan əvvəl yoxlayan “AI Guardian” təhlükəsizlik alətinin açıq beta versiyasını çıxarıb. “macOS” üçün hazırlanan tətbiq agentlərin icazəsiz əməliyyatlarını bloklayır və qərarları sonradan yoxlamaq üçün qeydə alır. Məqsəd proqramlara, şəxsi fayllara və giriş məlumatlarına verilən çıxışdan sui-istifadənin qarşısını almaqdır.    “AI Guardian” ayrıca tətbiq kimi işləyir. İlkin mərhələdə “Claude Code 2.1.121” və “OpenClaw 2026.6.6” dəstəklənir. Proqram arxa planda işləyərək agentin etmək istədiyi əməliyyatları istifadəçinin qoyduğu qaydalarla müqayisə edir. Sorğuya icazə verilə, şübhəli işarəsi qoyula və ya sorğu tam bloklana bilər. Məlumatlar cihazda emal olunur. Saytların etibarlılığını yoxlamaq kimi bəzi xidmətlər üçün şirkətin bulud sistemi işlədilə bilər.    Alət agenti gizli təlimatlarla yönləndirmək cəhdlərini aşkarlayır və belə əməliyyatların təsdiqsiz aparılmasının qarşısını alır. “AI Guardian” agentlərlə xarici alətlər arasında əlaqə quran MCP komponentlərini də yoxlayır. Şübhəli və ya sonradan dəyişdirilmiş alətlər dayandırılır. Agentin bacarıqları da işə salınmazdan əvvəl yoxlamadan keçir. Açıq qalmış API məlumatlarına, SSH açarlarına və sistem hesablarına icazəsiz giriş bloklana bilər.    Şirkətin istinad etdiyi araşdırma 20 süni intellekt agentini sınaqdan keçirib və onlara qarşı 1300-dən çox zərərli alət cəhdi aparıb. Hücumların 36,5%-i uğurlu olub, modellərdən biri isə cəhdlərin 72,8%-də yönləndirilib. Başqa bir araşdırmada 2025-ci ildə süni intellekt xidmətlərinə aid 1,2 milyondan çox məxfi məlumatın açıq qaldığı üzə çıxıb. Bu rəqəm bir ildə 81% artıb, açıq MCP sazlamalarında 24 000-dən çox giriş məlumatı tapılıb.    “AI Guardian” əsasən kod yazmaq və texniki işlər görmək üçün agentlərdən yararlanan proqramçı və mütəxəssislər üçün hazırlanıb. Alət açıq beta dövründə pulsuzdur. İlk versiya yalnız ingilis dilindədir və “macOS” istifadəçiləri üçün çıxıb. “Bitdefender” gələcəkdə digər əməliyyat sistemləri üçün də versiyalar buraxmağı planlaşdırır. Şirkətin agent təhlükəsizliyi məhsulları arasında daha 2 həll var.