Google Photos-a çəkdiyiniz videonun keyfiyyətini bir kliklə artıra biləcəyiniz xüsusiyyət əlavə edilir!

     Google bir kliklə Photos proqramında videoların keyfiyyətini yaxşılaşdırmağa imkan verəcək alət təqdim etməyi planlaşdırır. Hazırlanma mərhələsində olan xüsusiyyətin nə vaxt istifadəyə veriləcəyi hələlik bəlli deyil.

     Milyonlarla insanın istifadə etdiyi Google Photos tətbiqi fotoşəkillərin ehtiyat nüsxəsini çıxarmaqdan tutmuş redaktə etməyə kimi bir çox faydalı xüsusiyyətlərə malikdir. Həm iOS, həm də Android-də mövcud olan bu redaktə alətləri fotoların parlaqlığını, rənglərini və daha çoxunu tənzimləməyə və şəkillərin keyfiyyətini bir kliklə yaxşılaşdırmağa imkan verir.     İndi alınan məlumatlara görə isə, Google-un tətbiqdəki videolar üçün də bənzər bir xüsusiyyəti gətirəcəyini görürük. Android proqramında diqqət çəkən və hazırda inkişaf mərhələsində olan bu xüsusiyyət isə AssesmbleDebug tərəfindən paylaşılıb.     “Videonuzu təkmilləşdirin” adlanan bu xüsusiyyət bir kliklə Google Photos tətbiqində videolarınızın keyfiyyətini yaxşılaşdırmağa imkan verəcək. Paylaşılan ekran görüntüsündə bu xüsusiyyətin, tətbiqin redaktə bölməsində yer alan "stabilləşdirmə" düyməsinin düz yanında yerləşdiriləcəyini görə bilərik.     Yeni alət videoların bir çox elementlərini təkmilləşdirməklə keyfiyyətini artıra biləcək. Bunlara parlaqlıq, rənglər və kontrast kimi video redaktə alətləri daxildir. Bunun biraz Pixel 8 Pro smartfonlarında yer alan "Video Boost" xüsusiyyətinə də bənzədiyini deyə bilərik. Lakin bu dəfə video keyfiyyətini artırma xüsusiyyəti buludda deyil, tamamilə cihazda işləyəcək. Bu o deməkdir ki, keyfiyyətin yaxşılaşdırılması aşağı və ya orta səviyyəli Android smartfonları olan istifadəçilər üçün müəyyən vaxt tələb edə biləcək xüsusiyyət ola bilər.