Ledger kriptocüzdanlarından oğurluq dəyişdirilmiş cihazlarla bağlanır

    “Ledger” kriptocüzdanlarından pul oğurlanması ilə bağlı şikayətlər artır. Hadisənin “CryptoBillis” satıcısından alınan və sonradan dəyişdirilən cihazlarla bağlı olduğu güman edilir. “Ledger” araşdırma bitənədək “CryptoBillis”dən bu kriptocüzdanların satışını dayandırmağı istəyib. Şirkət zərərçəkənlərdən birinin cihazına icazəsiz elektron hissə əlavə olunduğunu təsdiqləyib.    “X” və “Threads”də yayılan foto və videolarda ekranın altında kiçik elektron lövhə görünür. İddiaya görə, bu hissə ekrandakı məlumatları, o cümlədən cihaz ilk dəfə qurularkən verilən “seed” ifadəsini ələ keçirir. “Seed” ifadəsi kriptocüzdanı bərpa etmək və içindəki vəsaitə çıxış əldə etmək üçün lazım olan gizli sözlər toplusudur. Elektron lövhə daxili SIM kartla bu məlumatı hücum edən şəxsə göndərə bilir.    Hücumun arxasındakı şəxslərin yüzlərlə cüzdandan 86 milyon dollardan çox kriptovalyuta oğurladığı deyilir. Bu, təxminən 146,2 milyon manatdan çoxdur. Hadisə əsasən Cənub-Şərqi Asiyadakı istifadəçilərə və “CryptoBillis” üzərindən satılan cihazlara təsir edib. Belə hücumlarda cihaz alıcıya çatmazdan əvvəl dəyişdirilir və içinə əlavə hissələr qoyulur.    Hazırda “Ledger” sistemlərinin sındırıldığını göstərən əlamət yoxdur. Birbaşa şirkətdən alınan kriptocüzdanların təsirləndiyinə dair məlumat da açıqlanmayıb. “Ledger” cihazda kənar müdaxilə izlərini yoxlamaq üçün istifadəçilərə təlimat yayımlayıb. Araşdırmanın indiki mərhələsində əsas şübhə “CryptoBillis”dən alınan cihazlara yönəlib.