OpenAI Pentaqonla razılaşmasının detallarını açıqladı

  Technote.az "TechCrunch” platformasına istinadən bildirir ki, OpenAI ABŞ Müdafiə Nazirliyi (United States Department of Defense) ilə imzaladığı yeni razılaşma barədə əlavə detalları açıqlayıb. Şirkətin CEO-su Sam Altman razılaşmanın “mütləq şəkildə tələsik” bağlandığını və bunun ictimai baxımdan yaxşı görünmədiyini etiraf edib.  Məlumata görə, Anthropic ilə Pentaqon arasında aparılan danışıqlar uğursuzluqla nəticələndikdən sonra Donald Trump federal qurumlara Anthropic texnologiyalarından istifadənin dayandırılması barədə göstəriş verib. Müdafiə naziri Pete Hegseth isə şirkəti təchizat zənciri üçün risk kimi qiymətləndirib. Şirkətin rəsmi bloq paylaşımında qeyd olunur ki, OpenAI modelləri üç əsas istiqamətdə istifadə edilə bilməz:

• Kütləvi daxili nəzarət (mass domestic surveillance)
• Tam avtonom silah sistemləri
• “Sosial kredit” tipli yüksək riskli avtomatlaşdırılmış qərar mexanizmləri

  OpenAI bildirir ki, bəzi digər AI şirkətlərindən fərqli olaraq, təhlükəsizlik mexanizmlərini zəiflətməyib və yalnız istifadə qaydalarına arxalanmayıb. Şirkətə görə, onların yanaşması “çoxsəviyyəli və geniş qoruma mexanizmlərinə” əsaslanır.  Bloqda vurğulanır ki:

• Təhlükəsizlik sistemi üzərində tam nəzarət OpenAI-da qalır
• Modellər yalnız bulud (cloud API) üzərindən təqdim olunur
• Təhlükəsizlik icazəsi olan OpenAI əməkdaşları prosesə nəzarət edir
• Müqavilədə əlavə hüquqi qoruma mexanizmləri mövcuddur

  Bununla belə, bəzi ekspertlər razılaşmanı tənqid ediblər. Techdirt nəşrinin yazarı Mayk Masnik müqavilədə ABŞ-nin 12333 saylı İcra Sərəncamına istinadın faktiki olaraq daxili nəzarət imkanlarını açıq saxladığını iddia edib. OpenAI-ın milli təhlükəsizlik tərəfdaşlıqları üzrə rəhbəri Katrina Malliqan isə bildirib ki, müqavilədəki bir maddəni əsas götürərək geniş nəticələr çıxarmaq düzgün deyil. Onun sözlərinə görə, texniki yerləşdirmə arxitekturası müqavilə dilindən daha vacibdir və modellərin yalnız bulud üzərindən təqdim edilməsi onların birbaşa silah sistemlərinə və ya əməliyyat avadanlıqlarına inteqrasiyasının qarşısını alır.