Qualcomm yeni Snapdragon Wear Elite çipini təqdim etdi

  Technote.az "The Verge” platformasına istinadən bildirir ki, Qualcomm süni intellekt əsaslı geyilə bilən cihazlar üçün yeni Snapdragon Wear Elite çipini təqdim edib. Şirkət bu platformanı “wrist plus” kateqoriyası adlandırır. Yəni bu çip mövcud Snapdragon W5 Plus modelini əvəz etmir, onunla paralel şəkildə bazarda yer alacaq. Qualcomm-un açıqlamasına görə, Wear Elite xüsusilə AI əsaslı breloklar, yaxaya taxılan pin cihazları və hətta displeysiz ağıllı eynəklər üçün nəzərdə tutulub. Daha güclü və geniş imkanlı AR eynəklər isə şirkətin ayrıca artırılmış reallıq çiplərindən istifadə edəcək.  Yeni çip 3 nanometrlik istehsal prosesi ilə hazırlanıb və iki əsas AI bloku ilə təchiz olunub:

• eNPU – aşağı enerji sərf edən funksiyalar üçün
• Hexagon NPU – daha ağır hesablama tələb edən süni intellekt tapşırıqları üçün

  Qualcomm bildirir ki, Hexagon NPU cihaz daxilində 2 milyard parametrə qədər AI modelini işlədə və saniyədə 10 token emal edə bilir. Bu isə o deməkdir ki, generativ AI funksiyaları birbaşa cihaz üzərində, bulud bağlantısı olmadan işləyə bilər. Platforma təkcə Android və Wear OS ilə deyil, həm də Linux sistemləri ilə uyğun işləyəcək. Bu isə xüsusilə startapların öz fərdi əməliyyat sistemləri ilə AI brelok və aksesuarlar hazırlamasını asanlaşdıra bilər.