Apple və Samsung smartfonların təmir imkanlarına görə ən aşağı qiymətləri aldı

ABŞ-də fəaliyyət göstərən U.S. PIRG Education Fund smartfon və noutbukların təmir imkanlarını qiymətləndirən “2026 Failing the Fix” hesabatını yayımlayıb. Nəticələrə görə, Apple və Samsung smartfon kateqoriyasında ən aşağı qiymətləri alan istehsalçılar arasında yer alıb. Noutbuklarda isə Apple sonuncu olub.

Smartfonların qiymətləndirilməsində Avropa İttifaqının EPREL sistemindəki məlumatlardan istifadə edilib. Burada cihazın sökülməsinin asanlığı, ehtiyat hissələri və təmir alətlərinin əlçatanlığı, proqram təminatı dəstəyi və təmir sənədləri kimi meyarlar nəzərə alınıb.

Smartfon kateqoriyasında Motorola B+ qiyməti ilə birinci yeri tutub. Google C-, Samsung D, Apple isə D- qiyməti alıb. Beləliklə, Apple sonuncu, Samsung isə sondan ikinci yerdə qərarlaşıb.

Noutbuklarda ən yüksək nəticəni B+ qiyməti ilə Asus göstərib. Acer B, HP, Dell, Samsung və Microsoft B-, Lenovo C, Apple isə C- qiyməti alıb. 2025-ci illə müqayisədə HP nəticəsini C-dən B–yə, Lenovo isə F-dən C-yə yüksəldib. Acer və Asus-un qiymətləri isə bir pillə aşağı düşüb.

Apple və Samsung-un aşağı nəticə göstərməsinin əsas səbəbləri arasında cihazların sökülməsinin çətinliyi, yapışqanlardan geniş istifadə və müəyyən komponentlərin konkret cihazlarla proqram səviyyəsində əlaqələndirilməsi göstərilir. Apple-ın bəzi üçüncü tərəf ehtiyat hissələrinin istifadəsini məhdudlaşdırması və Face ID komponentlərinin dəyişdirilməsi ilə bağlı məhdudiyyətlər də yekun qiymətə təsir edib.

Hesabatda Activation Lock funksiyasının müəyyən komponentlərlə əlaqələndirilməsinin işlək vəziyyətdə olan hissələrin başqa cihazların təmirində istifadəsini çətinləşdirdiyi də qeyd olunur.

Bununla belə, Apple son illərdə cihazlarının təmir imkanlarını yaxşılaşdırmaq üçün müəyyən dəyişikliklər edib. iPhone 16 seriyası və iOS 18 ilə təqdim edilən Repair Assistant istifadə olunmuş orijinal Apple komponentlərinin başqa cihazda kalibrasiya edilərək yenidən istifadəsinə imkan verir. Daha yeni iPhone Air və iPhone 17 Pro modellərində isə elektrik vasitəsilə çıxarıla bilən yapışqan, standartlaşdırılmış vintlər, ehtiyat hissələrinə və təmir sənədlərinə çıxış kimi yeniliklər mövcuddur.

Samsung da 2022-ci ildə istifadəçilərin cihazlarını özlərinin təmir etməsinə imkan verən proqramını başladıb və sonrakı illərdə ehtiyat hissələri ilə servis imkanlarını genişləndirib. PIRG Galaxy A57 və Galaxy S25 Ultra modellərini son illərdə təmiri daha asan olan Galaxy cihazları arasında göstərir.

Hesabatda cihazların fiziki olaraq təmir edilə bilməsinin onların uzun müddət istifadəsi üçün kifayət etmədiyi də vurğulanır. Proqram və təhlükəsizlik yeniləmələrinin dayandırılması texniki baxımdan işlək vəziyyətdə olan cihazların istifadə müddətini məhdudlaşdıra bilər. Buna görə EPREL qiymətləndirməsində istehsalçının təqdim etdiyi proqram təminatı dəstəyinin müddəti də nəzərə alınır.