Donald Tramp və ABŞ-ın İT nəhənglərinin rəhbərləri süni intellektə nəzarət haqqında saziş imzalayıblar

ABŞ Prezidenti Donald Tramp Amerikanın aparıcı texnologiya şirkətləri — Google, Anthropic, Meta, OpenAI, xAI və Nvidia-nın rəhbərləri ilə görüşüb. Görüşün yekununda süni intellektə nəzarət sahəsində birgə öhdəliklər haqqında saziş imzalanıb. «Ağ Evin superintellekt haqqında sazişi» adlı sənəd Amerika prezidentinin Truth Social sosial şəbəkəsində dərc edilib.

Tramp bildirib ki, saziş «mənəvi qüvvəyə» malikdir və məhkəmə qaydasında məcburi icra edilə bilməz. Bununla belə, sənəddə «zaman keçdikcə bu tədbirlərin qanunlarda və ya normativ aktlarda təsbit edilməsinə ehtiyac yarana bilər» deyilir.

Sənəddə bildirilir ki, hər bir şirkət texnologiyaların təhlükəsiz hazırlanmasına görə məsuliyyət daşıyır. Bunun üçün tərtibatçıların «texnologiyalarının davranışının nəzərdə tutulana uyğun olmasına və istənilən problemin operativ şəkildə aşkarlanıb həll edilməsinə zəmanət verən etibarlı daxili prosesləri və nəzarət vasitələri olmalıdır».

Saziş qabaqcıl süni intellekt modelləri yaradan şirkətlər üçün dörd səviyyəli nəzarət və audit nəzərdə tutur:

Kibertəhlükəsizlik, bioloji və kimyəvi təhdidlər kimi sahələrdə təlim və tətbiq zamanı öz modellərinin imkanlarını və uyğunluğunu izləmək, eləcə də modellərin texniki sistemləri sındırmayacağına zəmanət vermək üçün etibarlı daxili nəzarət mexanizmlərinin yaradılması;
Bütün nəzarət, monitorinq və aşkarlama mexanizmlərinin nəzərdə tutulduğu kimi işləməsinə və istənilən problemin operativ şəkildə aradan qaldırılmasına zəmanət vermək üçün daxili komandanın fəaliyyətinin təmin edilməsi;
Nəzarət, monitorinq və aşkarlama mexanizmlərinin lazımi qaydada işləyib-işləmədiyinə dair müstəqil yoxlamaların aparılması üçün müstəqil kənar auditorun və ya qiymətləndiricinin cəlb edilməsi;
Nəzarət mexanizmlərini idarə edən komandaları izləyəcək, daxili və kənar auditorlardan və qiymətləndiricilərdən hesabatlar alacaq və aşkarlanmış problemlərin aradan qaldırılmasına nail olacaq direktorlar şurası yanında müstəqil komitənin təyin edilməsi.

Sənəddə həmçinin qeyd olunur ki, şirkətlər sistemlərinin təhlükəsizliyini artırmaq üçün standartları və ən yaxşı təcrübələri müəyyənləşdirmək məqsədilə mütəmadi görüşəcəklər.