Azercell-in baş icraçı direktoru Rəqəmsal Əməkdaşlıq Təşkilatının (DCO) baş katibi Dima Əl-Yəhya ilə görüşüb

Azercell-in baş icraçı direktoru Zərinə Zeynalova Rəqəmsal Əməkdaşlıq Təşkilatının (DCO) baş katibi Dima Əl-Yəhya ilə görüşüb.

Görüş Azərbaycanın təşkilata qoşulmasından sonra DCO-nun baş katibinin ölkəyə səfəri çərçivəsində keçirilib. Azərbaycanın rəqəmsal ekosisteminin əsas iştirakçılarından biri olan Azercell ölkənin rəqəmsal inkişafı, qlobal rəqəmsal iqtisadiyyatda mövqelərinin möhkəmləndirilməsi və beynəlxalq əməkdaşlığın genişləndirilməsi ilə bağlı dialoqda iştirak edib.

Azərbaycanın DCO-ya qoşulması rəqəmsal sahədə beynəlxalq əməkdaşlığın möhkəmləndirilməsi və ölkənin Qafqazı, Mərkəzi Asiyanı və digər bazarları birləşdirən regional rəqəmsal mərkəz kimi potensialının reallaşdırılması yolunda növbəti addım olub. Bu kontekstdə Azercell-də keçirilən görüşdə telekommunikasiya şirkətlərinin rolunun necə dəyişdiyi, rəqəmsal xidmətlər, məlumatlar və süni intellekt iqtisadiyyat üçün getdikcə daha böyük əhəmiyyət kəsb etdikcə sektor üçün hansı yeni imkanların yarandığı müzakirə olunub.

Zərinə Zeynalova Azercell-in qabaqcıl rabitə imkanlarına, rəqəmsal xidmətlərin, məlumatlarla işləmə texnologiyalarının və süni intellektin inkişafına əsaslanan müasir rəqəmsal ekosistemin yaradılması ilə bağlı baxışından danışıb. O qeyd edib ki, şirkətin strateji prioritetləri rabitənin inkişafı və rəqəmsallaşma çərçivəsindən kənara çıxır və hazırda süni intellektin getdikcə daha mühüm rol oynadığı iqtisadiyyatda uğurlu inkişaf üçün zəruri olan imkan və səriştələrin formalaşdırılmasına yönəlib. Bu yanaşma Azercell-ə Azərbaycanın rəqəmsal transformasiyasına töhfə verməyə imkan yaradacaq.

Görüş zamanı süni intellektdən məsuliyyətli istifadəyə və insan kapitalının inkişafına xüsusi diqqət yetirilib. Süni intellektin uğurla tətbiqi yalnız texnoloji həlləri deyil, həm də keyfiyyətli infrastruktur və məlumatları, onlardan istifadəyə düşünülmüş yanaşmanı, eləcə də peşəkar bilik və bacarıqların inkişafı üzrə sistemli işi tələb edir.

Görüşdə qadınların rəqəmsal iqtisadiyyatın formalaşdırılmasındakı rolu da müzakirə olunub. Söhbət zamanı tərəflər qadınların təkcə texnologiyalardan istifadədə deyil, həm də onların yaradılmasında, texnologiya şirkətlərinin idarə edilməsində və rəqəmsal iqtisadiyyatın gələcəyini müəyyənləşdirən qərarların qəbulunda daha fəal iştirakının vacibliyini qeyd ediblər.

İştirakçılar həmçinin Azərbaycanın gələcək rəqəmsal inkişafı üçün zəruri olan səriştələrin inkişaf etdirilməsi və mütəxəssislərin hazırlanmasında dövlət, biznes, texnologiya icması və beynəlxalq təşkilatlar arasında qarşılıqlı fəaliyyətin əhəmiyyətini müzakirə ediblər.