AzInTelecom-un rəqəmsal imza infrastrukturu “WebTrust for CA” beynəlxalq auditindən uğurla keçib

AZCON Holding-in tərkibinə daxil olan “AzInTelecom” MMC “WebTrust for Certification Authorities” (WebTrust for CA) beynəlxalq auditindən uğurla keçib. Müstəqil audit AzInTelecom-un rəqəmsal imza infrastrukturunun beynəlxalq təhlükəsizlik və idarəetmə standartlarına uyğunluğunu təsdiqləyib.

Amerika Sertifikatlı İctimai Mühasiblər İnstitutu (AICPA) və Kanadanın Peşəkar Mühasiblər Təşkilatı (CPA Canada) tərəfindən hazırlanmış “WebTrust for CA” sertifikatlaşdırma xidmətləri göstərən təşkilatlar üçün beynəlxalq səviyyədə tanınan audit standartıdır. Audit çərçivəsində müstəqil auditorlar AzInTelecom-un informasiya təhlükəsizliyinin idarə edilməsi sistemlərini, kriptoqrafik açarların idarə edilməsi proseslərini və şirkətin əməliyyat fəaliyyətini hərtərəfli qiymətləndiriblər.

“Əsas məqsədimiz dövlət və biznes proseslərinin rəqəmsallaşdırılmasına, eləcə də etibarlı elektron xidmətlərin əlçatanlığının genişləndirilməsinə töhfə verən etibarlı infrastruktur yaratmaqdır. Müstəqil auditdən uğurla keçmək AzInTelecom-un daxili və beynəlxalq bazarlarda etibarlı texnoloji tərəfdaş kimi mövqeyini möhkəmləndirir və yeni əməkdaşlıq istiqamətlərinin inkişafı üçün zəmin yaradır”, — deyə AzInTelecom-un İnformasiya təhlükəsizliyi departamentinin rəhbəri Ruslan Dadayev bildirib.

“WebTrust for CA” auditinin nəticələri biznes strukturlarına, dövlət qurumlarına və fərdi istifadəçilərə AzInTelecom-un rəqəmsal imza xidmətlərinin təhlükəsizliyi, məxfiliyi və etibarlılığı ilə bağlı əlavə təminatlar verir. Bununla yanaşı, auditdən uğurla keçmək AzInTelecom-un beynəlxalq standartlara və tələblərə cavab verən, rəqəmsal imza sahəsində etibarlı tərəfdaş kimi mövqeyini möhkəmləndirir.

AzInTelecom rəqəmsal xidmətləri beynəlxalq standartlara uyğun təkmilləşdirməklə təhlükəsiz elektron xidmətlərin əlçatanlığının genişləndirilməsinə, ölkənin rəqəmsal ekosisteminin inkişafına və Azərbaycanın regional rəqəmsal haba çevrilməsinə töhfə verir.