iPhone 18 və 18e eyni 4430 mAh batareya ilə gələ bilər

    “Apple”ın 2027-ci ilin əvvəlində 3 yeni smartfon çıxaracağı gözlənilir. Bunlar “iPhone 18”, “iPhone 18e” və “iPhone Air 2” modelləridir. Yeni sızmada əsasən daha münasib qiymətli “iPhone 18” modellərinin texniki detalları açıqlanıb. Məlumat hələ rəsmən təsdiqlənməyib və cihazlar göstərilənədək bu göstəricilər dəyişə bilər.    Sızmaya görə, “iPhone 18” və “iPhone 18e” modellərində eyni 4430 mAh tutumlu batareya ola bilər. Bu, əvvəlki cihazlardakı batareyadan daha böyükdür və telefonların bir dolumla daha uzun işləməsinə kömək edə bilər. Hər iki modeldə eyni batareyanın işlədilməsi istehsal xərclərini də azalda bilər.    Hər iki smartfonun ekranının 6,3 düym olacağı iddia edilir. “iPhone 18e”nin ekranının böyüməsi çərtiyin aradan qalxacağına işarədir. Onu bildirişləri və açıq tətbiqləri göstərən “Dynamic Island” sahəsi əvəz edə bilər. “Apple” indiyədək çərtikli 6,3 düymlük ekran çıxarmayıb.    Kameralarda da bəzi fərqlər gözlənilir. “iPhone 18”in əsas kamera sensoru ölçü baxımından bir qədər kiçilə bilər, amma çəkiliş keyfiyyətini göstərən təsvir ölçüsü yenə 48 MP qalacaq. Daha geniş sahəni kadra salan ultrageniş kamera yalnız “iPhone 18”də ola bilər. “iPhone 18e”də belə kameranın olmayacağı gözlənilir.    Əvvəlki məlumatlarda deyilirdi ki, “Apple” daha münasib modellərin istehsal xərcini azaltmaq üçün eyni istehsal prosesini seçə bilər. Buna süni intellekt sistemlərinə tələbat artdıqca yaddaş hissələrinin bahalaşması səbəb göstərilirdi. Enerjiyə daha qənaətli işləyəcəyi gözlənilən “A20” prosessoru da böyük batareya ilə birlikdə telefonların işləmə müddətini artıra bilər. “iPhone Air 2” barədə əlavə texniki məlumat açıqlanmayıb.