OPPO F35 5G və F35 Pro 5G 8000 mAs batareya və 50 MP-lik selfi kamerası ilə təchiz edilib

OPPO şirkəti Hindistanda orta səviyyəli F35 5G və F35 Pro 5G smartfonlarını təqdim edib. Hər iki model 80 Vt gücündə SuperVOOC sürətli naqilli enerji doldurmasını dəstəkləyən 8000 mAs tutumlu batareya ilə təchiz olunub. Bundan əlavə, hər iki smartfon avtofokuslu və 100 dərəcə baxış bucağına malik yüksək ayırdetməli 50 MP-lik ön kamera, ekranaltı barmaq izi skaneri və IP66/IP68/IP69/IP69K standartları üzrə tam qoruma əldə edib. Yeni qurğular ColorOS 16.5 interfeysli Android 16 əməliyyat sistemi ilə işləyir.

OPPO F35 5G 120 Hz tezliyə və 1400 nitədək parlaqlığa malik 6,57 düymlük Full HD+ (2372х1080 piksel) OLED ekranla təchiz olunub. Panel 10 bitlik rəng təsvirini dəstəkləyir və DCI-P3 rəng məkanını tam əhatə edir.

Smartfon MediaTek Dimensity 6360 Max prosessoru əsasında hazırlanıb, operativ yaddaşın həcmi 6 və ya 8 GB, UFS 2.2 fleş yaddaşın tutumu isə 128 GB təşkil edir. Əsas kamera 50 MP-lik əsas moduldan və səhnə dərinliyinin təhlili üçün 2 MP-lik sensordan ibarətdir. Wi-Fi 5 və Bluetooth 5.4 dəstəyi var. Qurğunun çəkisi 205 qramdır.

OPPO F35 Pro 5G 1,5K (2772х1272 piksel) ayırdetməyə, 144 Hz-dək yenilənmə tezliyinə və 1800 nitədək parlaqlığa malik 6,78 düymlük OLED ekranla təchiz olunub. Panel həmçinin 10 bitlik rəng təsvirini və DCI-P3 rəng məkanının 100% əhatəsini dəstəkləyir.

Smartfon MediaTek 7360 Max prosessoru əsasında hazırlanıb, 6 və ya 8 GB LPDDR5X operativ yaddaş və daha sürətli 128 və ya 256 GB-lıq UFS 3.1 fleş yaddaş nəzərdə tutulub. Əsas kamera f/1,8 obyektivə və optik sabitləşdirməyə malik 50 MP-lik sensor, həmçinin 116 dərəcə baxış bucağına malik 8 MP-lik ultra genişbucaqlı modul əldə edib. Model Wi-Fi 6 və Bluetooth 5.4 dəstəkləyir. Çəkisi 210 qramdır.

OPPO F35 5G-nin qiymətləri: 6/128 GB — $406, 8/128 GB — $447. Mövcud korpus rəngləri: boz, çəhrayı və mavi. OPPO F35 Pro 5G-nin qiymətləri: 6/128 GB — $479, 8/128 GB — $521, 8/256 GB — $573. Rəng variantları: qəhvəyi, mavi və narıncı. Hindistanda satışlar oktyabrın 11-də başlayacaq.