Sahibkarlar Etender.gov.az portalında sənədləri “SİMA İmza” ilə imzalaya biləcəklər

Artıq sahibkarlar dövlət satınalmalarında iştirak üçün zəruri sənədləri onlayn formatda imzalaya biləcəklər.

Azərbaycanda həyata keçirilən rəqəmsal transformasiya çərçivəsində “SİMA İmza” dövlət satınalmalarının vahid internet portalına inteqrasiya edilib. Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi tərəfindən https://etender.gov.az/ portalında “SİMA İmza” vasitəsilə sənədlərin elektron formatda imzalanması imkanı yaradılıb.

Hazırda sahibkarlar portalda şirkətlərin maliyyə hesabatlarını, eləcə də Dövlət Vergi Xidmətindən müvafiq arayışların alınması ilə bağlı müraciətləri imzalamaq üçün “SİMA İmza”dan istifadə edə bilərlər. Proses tamamilə rəqəmsal formatda həyata keçirilir. Sahibkarlar xidmət mərkəzlərinə getmədən mobil tətbiq vasitəsilə elektron imza əldə edə və  tender prosedurlarında məsafədən iştirak edə bilərlər.

Bunun sayəsində sənədlərin imzalanması prosesi sadələşir, əməliyyat yükü azalır, həmçinin prosedurların daha çevik və operativ şəkildə həyata keçirilməsi təmin olunur. Eyni zamanda, elektron imzanı onlayn əldə etmək imkanı kiçik və orta sahibkarlıq subyektlərinin dövlət satınalmalarında iştirakını asanlaşdırır, rəqabət mühitinin genişlənməsinə və proseslərin şəffaflığının artırılmasına töhfə verir.

Bu yenilik ölkədə dövlət xidmətlərinin rəqəmsallaşdırılması istiqamətində aparılan işlərin bir hissəsidir. Azərbaycan Respublikası Prezidentinin 16 yanvar 2025-ci il tarixli Fərmanı ilə təsdiq edilmiş “Azərbaycan Respublikasında rəqəmsal inkişaf Konsepsiyası”nda dövlət xidmətlərinin modernləşdirilməsi və rəqəmsal platformalara keçirilməsi əsas istiqamətlər sırasında müəyyən edilib.

“AzInTelecom” SİMA-nın tətbiq sahələrini genişləndirməyə, istifadəçilər üçün rəqəmsal xidmətlərdən rahat və əlçatan istifadə təcrübəsi yaratmağa davam edəcək.

“SİMA İmza” haqqında

“SİMA İmza” AZCON Holding-in tərkibinə daxil olan “AzInTelecom” MMC tərəfindən hazırlanmış yeni nəsil rəqəmsal imzadır. “SİMA İmza” istifadəçilərə müxtəlif dövlət və özəl xidmətlərdən təhlükəsiz və sürətli şəkildə yararlanmağa imkan verən rəqəmsal imza həllidir. Xidmət mərkəzinə getməyə ehtiyac olmadan mobil tətbiq vasitəsilə rəqəmsal imzanı pulsuz əldə etmək mümkündür.