Samsung Galaxy Fit4 fitnes qolbağının ilk görüntüləri sızdı

    “Samsung”-un münasib qiymətli “Galaxy Fit3” fitnes qolbağını əvəz edəcək “Galaxy Fit4” modelinin ilk görüntüləri yayılıb. Sızdırılan şəkil və videolarda cihazın görünüşü, eləcə də mümkün rəngləri göstərilir. Şirkət yeni modeli yaxın vaxtlarda elan edə bilər, amma hələ rəsmi açıqlama və dəqiq tarix yoxdur.    Görüntülərə görə, “Galaxy Fit4” əvvəlki modelə çox bənzəyəcək. Qolbağın küncləri yumru düzbucaqlı ekranı saxlanacaq. Arxadakı sağlamlıq göstəricilərini ölçən sensorların yeri də dəyişməyəcək. Buna görə “Galaxy Fit4” və “Galaxy Fit3” modellərini ilk baxışdan ayırmaq çətin ola bilər.    Şəkillər qolbağın qara, açıq mavi və ağ olmaqla 3 rəngdə çıxacağını göstərir. Görünüşdə böyük dəyişiklik olmasa da, “Samsung” cihazın daxili hissələrini yeniləyə bilər. Yeni proqram funksiyalarının əlavə ediləcəyi də gözlənilir. Ancaq texniki göstəricilər hələ açıqlanmayıb.    “Samsung” əvvəlki “Galaxy Fit3” modelini 2024-cü ilin fevralında təqdim etmişdi. Qolbağın satış qiyməti təxminən 60 dollar (təxminən 100 manat) idi. “Galaxy Fit4” modelinin də münasib qiymətə satılacağı gözlənilir. İddialara görə, onun qiyməti 100 dollardan aşağı (170 manatdan az) olacaq. Satış tarixi hələ bilinmir.