Sındırılmış PlayStation 5 üçün yeni qeyri-rəsmi oyun mağazası yaradılıb

Sony-nin PlayStation oyunlarının rəqəmsal yayımına üstünlük verməsi və rəqəmsal satınalmaların tam mülkiyyət hüququ verməməsi ilə bağlı müzakirələr fonunda PlayStation 5 konsolları üçün qeyri-rəsmi proqram təminatına maraq artır. Techpowerup-ın məlumatına görə, bu dəfə jailbreak edilmiş PS5 və PS5 Pro cihazları üçün Overdrive adlı yeni oyun mağazası təqdim olunub.

Bundan əvvəl 7.00–13.60 proqram təminatı versiyalarında işləyən jailbreak həlləri və Orbit Store adlı açıq mənbəli oyun mağazası ortaya çıxmışdı. Overdrive isə bu istiqamətdə təqdim edilən növbəti layihədir.

Yeni mağaza interfeys baxımından PlayStation Store-a bənzəyir. Kataloqda Battlefield 6 və Forza Horizon 5 kimi oyunlarla yanaşı, əlavə yüklənə bilən məzmun paketləri (DLC) də yer alır. Lakin oyunların qiyməti əvəzinə faylların yüklənmə həcmi və istifadəçi qiymətləndirmələri göstərilir.

Əvvəl təqdim olunan Orbit Store oyun fayllarını öz serverlərində saxlamadığını, yükləmə keçidlərini Archive.org platformasından əldə etdiyini bildirmişdi. Overdrive-ın da oxşar prinsiplə işlədiyi ehtimal olunur, lakin bu barədə dəqiq məlumat yoxdur.

İlkin rəylərdə Overdrive-ın interfeysinin hələ kifayət qədər təkmilləşdirilmədiyi və layihənin tələsik hazırlandığı qeyd edilir.

Bununla belə, jailbreak əməliyyatları müəyyən risklər daşıyır. Konsolun proqram təminatına icazəsiz dəyişiklik edilməsi təhlükəsizlik problemlərinə, onlayn xidmətlərə çıxışın məhdudlaşdırılmasına və zəmanətlə bağlı çətinliklərə səbəb ola bilər. Qeyri-rəsmi mağazalardan müəllif hüquqları ilə qorunan oyunların icazəsiz əldə edilməsi də hüquqi risk yaradır.

Məlumata görə, Sony 14.00 və 14.10 proqram yeniləmələri ilə jailbreak üçün istifadə olunan təhlükəsizlik boşluqlarını aradan qaldırıb. Buna görə də hazırda təsvir edilən üsullar əsasən 13.60 və daha əvvəlki proqram təminatı versiyalarına aiddir.