Texnologiyalar və qadın potensialı: Bir «Ctrl is hers» proqramının qalibləri üçün təlimlərə başlayıb

Bir ekosisteminin qadınların İT sahəsində bilik və bacarıqlarını inkişaf etdirməsinə dəstək olmaq, eləcə də karyera imkanları yaratmaq məqsədilə həyata keçirdiyi «Ctrl is hers» proqramı çərçivəsində 66 iştirakçı üçün intensiv təlimlər başlayıb.

Qısa müddət ərzində proqramda iştirak üçün 1012 müraciət daxil olub. Çoxmərhələli seçim prosesinin ilkin mərhələsində 652 namizəd texniki testə buraxılıb. Testlərin nəticələrinə əsasən 103 namizəd müsahibəyə dəvət olunub, müsahibənin yekununda isə 66 qadın proqramın iştirakçısı olub.

Layihənin davamında seçilmiş namizədlər kibertəhlükəsizlik, Frontend və Backend proqramlaşdırma, Data Science (verilənlər elmi), İT əməliyyatları və texniki dəstək, mobil tətbiqlərin hazırlanması, UX/UI dizayn, İT biznes-analitika, keyfiyyətə nəzarət və testləşdirmə (QA), İT menecment, eləcə də DevOps və bulud texnologiyaları kimi istiqamətlər üzrə intensiv təlim keçəcəklər.

Layihə çərçivəsində iştirakçılar artıq Bir ekosisteminin rəhbər heyəti və müvafiq sahələr üzrə ekspertləri ilə görüşüblər. Görüşdə Bir ekosisteminin rəhbəri Fərid Hüseynov, ödəniş biznesinin rəhbəri Cəlal Orucov, eləcə də Təşkilati inkişaf və HR texnologiyaları departamentinin direktoru Aygün Musayeva iştirak ediblər. Tədbir zamanı mütəxəssislər öz peşəkar təcrübələrini bölüşüb və texnologiya sahəsində karyera qurmaqla bağlı praktiki məsləhətlər veriblər.

Bir ekosisteminin rəhbəri Fərid Hüseynov layihə ilə bağlı gözləntilərini bölüşüb: «Texnologiyaların sürətli inkişafı yalnız yeni imkanlar yaratmır, həm də bu imkanları reallaşdıra biləcək istedadlara və yeni bacarıqlara tələbatı artırır. «Ctrl is hers» proqramı qadınların texnologiya sahəsində öz potensiallarını üzə çıxara biləcəkləri mühitin yaradılması baxımından bizim üçün xüsusilə vacibdir. Biz istəyirik ki, burada siz yalnız bilik əldə etməyəsiniz, həm də texnologiyaların real biznes mühitində necə tətbiq olunduğunu görəsiniz, peşəkarlarla ünsiyyət qurasınız və karyera yolunuzu daha böyük inam və güclə davam etdirəsiniz. İnanıram ki, bu proqram yalnız qadınların şəxsi inkişafını dəstəkləməyəcək, həm də əmək bazarında ixtisaslı texnologiya mütəxəssislərinin sayının artmasına töhfə verəcək».

Təlimlər yalnız nəzəri biliklərlə məhdudlaşmır. İştirakçılar müxtəlif texnoloji istiqamətlərdə çalışan Bir ekosisteminin mütəxəssisləri ilə birbaşa ünsiyyət qurur, real iş mühiti ilə tanış olur və yeni biliklərini praktikada tətbiq etmək imkanı əldə edirlər.

Təlimlərin yekununda iştirakçıların irəliləyişi qiymətləndiriləcək. Proqramın nəticələrinə uyğun olaraq, onların təcrübə proqramlarında iştirakı və Bir ekosistemi daxilində gələcək karyera imkanlarının yaradılması nəzərdə tutulub.