Türkiyədə 15 yaşdan kiçik uşaqlara sosial şəbəkələrdən istifadə qadağan ediləcək

2026-cı il noyabrın 1-dən Türkiyədə uşaqların sosial şəbəkələrdən istifadəsinə məhdudiyyətlər qüvvəyə minəcək. Müvafiq qərar oktyabrın 10-da hökumətin Resmî Gazete nəşrində dərc olunub.

Yeni qaydalara əsasən, sosial platformalara 15 yaşdan kiçik uşaqlara xidmət göstərmək qadağan ediləcək, 15–18 yaşlı yeniyetmələr üçün isə fərdi məlumatların əlavə qorunmasını nəzərdə tutan xüsusi rejim tətbiq olunmalıdır.

Valideynlərə və qəyyumlara uşaq hesablarına nəzarət etmək üçün alətlər təqdim ediləcək. Böyüklər profil parametrlərini idarə edə, yeniyetmələrin sosial şəbəkələrdə keçirdiyi vaxtı məhdudlaşdıra, ödənişli alışları və abunəlikləri təsdiqləyə biləcəklər.

İstifadəçilərin yaşı e-Devlet dövlət elektron xidmətlər platformasındakı xüsusi identifikator vasitəsilə yoxlanılacaq. Artıq mövcud olan hesabların sahibləri 2027-ci il martın 31-dək yaşlarını təsdiqləməlidirlər.

Yeni qaydalar yetkinlik yaşına çatmayanların məlumatlarının toplanmasını və istifadəsini də məhdudlaşdıracaq. Sosial şəbəkələrə toplanmış məlumatlar əsasında yeniyetmələrə digər hesabları tövsiyə etmək və onların profillərini başqa istifadəçilərə təklif etmək qadağan ediləcək.

Oxşar tədbirləri başqa ölkələr də tətbiq edir — ilk belə ölkə Avstraliya olub. Ölkədə 2025-ci il dekabrın 10-dan 16 yaşdan kiçik uşaqların sosial şəbəkələrdən istifadəsinə qadağa qüvvədədir.