Azercell-in dəstəyi ilə Bakıda AWS Agentic Football Cup — süni intellektin idarə etdiyi komandalar arasında virtual futbol turniri keçiriləcək

Oktyabrın 17-də Bakıda Azercell-in dəstəyi ilə AWS User Group Baku tərəfindən təşkil olunan AWS Agentic Football Cup keçiriləcək. Turnir çərçivəsində iştirakçılar süni intellektin idarə etdiyi futbol komandaları yaradacaq, oyun strategiyaları hazırlayacaq və onları virtual matçlarda sınaqdan keçirəcəklər. Bu format Sİ agentləri və bulud texnologiyaları ilə işləmək üzrə praktiki təcrübə qazanmağa imkan verəcək.

Turnir ənənəvi texnoloji tədbirlərdən fərqlənir. Hər futbol komandası ayrıca Sİ agentlərinin — oyun vəziyyətini təhlil edə və müstəqil qərarlar verə bilən proqramların idarə etdiyi beş virtual oyunçudan ibarət olacaq. İştirakçılar oyunçuların davranış alqoritmlərini hazırlayacaq, komandanın taktikasını müəyyənləşdirəcək və hazırlanmış proqramları Amazon Web Services (AWS) bulud platformasında yerləşdirəcəklər.

Matçlar zamanı virtual futbolçular insan müdaxiləsi olmadan avtonom şəkildə hərəkət edəcəklər. Sİ agentləri meydanda mövqe seçəcək, ötürmələr edəcək, müdafiə və hücum quracaq, qapıya zərbələr endirəcəklər. İştirakçılar oyunların nəticələrini təhlil edərək komandalarının proqram və strategiyalarını təkmilləşdirə biləcəklər.

Turnirə fərdi qaydada və ya komanda tərkibində qoşulmaq olar. Qeydiyyat Meetup platformasında açıqdır.

Turnir tələbələr, mühəndislər və yeni başlayan tərtibatçılar üçün təcrübə mübadiləsi və praktiki bacarıqların inkişafı baxımından səmərəli platformaya çevriləcək. Bu təşəbbüsü dəstəkləməklə Azercell süni intellekt sahəsində bilik və bacarıqların inkişafına, bulud texnologiyalarının praktik tətbiqinə və Azərbaycanın texnoloji icmasının möhkəmlənməsinə töhfə verir.